As në herën e tretë nuk ka rritur që të mbahet seanca fillestare ndaj kryetarit të Komunës së Pejës, Gazmend Muhaxheri, i cili akuzohet për mosekzekutim të vendimeve gjyqësore. Sikur dy seancat e kaluara, edhe kjo e së hënës në Gjykatën Themelore në Pejë, ka dështuar të mbahet për shkak se ka munguar i akuzuari Muhaxheri.
Gjykatësi Sejdi Blakaj, ka deklaruar se Muhaxheri, ka qenë i ftuar në mënyrë të rregullt, por që mungesën e tij nuk e ka arsyetuar. Ai ka marr vendim që ndaj kryetarit të Pejës të lëshohet urdhër që për seancën e radhës, të sillet me anë të Policisë.

Në seancën e së hënës, ka qenë prezent i dëmtuari Hysni Selmanaj, i cili ka kërkuar që për shkak të një intervenimi kirurgjik që ka pasur, kjo seancë të shtyhet për muajin dhjetor.

Gjykatësi Blakaj, seancën e radhës e ka caktuar për 27 dhjetor 2018, nga ora 13:00, raporton Betimi për Drejtësi. Ndryshe, seanca fillestare në këtë rast, ishte paraparë të mbahej edhe më 24 tetor 2017, por që ajo kishte dështuar, pasi kishte munguar kryetari i Pejës, Gazmend Muhaxheri.

Kurse, edhe seanca e caktuar për 22 mars të këtij viti, kishte dështuar të mbahej.

Gazmend Muhaxheri, akuzohet nga Prokuroria Themelore e Pejës për moszbatim të vendimeve gjyqësore të shkallës se parë dhe të dytë në cilësinë e kryetarit të Komunës së Pejës, duke mos e kthyer në vendin e tij të punës, Hysni Selmanajn, si drejtor të Auditorit të Brendshëm.

Sipas prokurorisë, Gazmend Muhaxheri, më 24 mars 2016, si person përgjegjës, në cilësinë e kryetarit të Komunës së Pejës, ka refuzuar të ekzekutojë vendimin e plotëfuqishëm të Gjykatës së Apelit të Kosovës.

Sipas aktakuzës, pasi që Gjykata e Apelit e ka refuzuar si të pabazuar, ankesën e të autorizuarit, debitorit Komuna e Pejës, ndërsa vendimin e Gjykatës Themelore të Pejës e ka vërtetuar, i pandehuri nuk e ka ekzekutuar vendimin në fjalë.

Sipas këtij vendimi i dëmtuari Hysni Selmanaj, është dashur të kthehet në vendin e punës si drejtor i Auditorit të Brendshëm, me të gjitha të drejtat dhe detyrimet, e duke i paguar 50% të pagës, nga dita e pezullimit e deri në zbatim të këtij vendimi.

Ndryshe, Komuna e Pejës, e kishte pezulluar nga puna, tani të dëmtuarin Selmanaj, me arsyetimin se më 27.04.2015, kryetari i Komunës së Pejës i është drejtuar Njësisë për Krime Ekonomike të Policisë së Kosovës, me kërkesën për fillimin e hetimeve ndaj Hysni Selmanaj lidhur me dyshimin e bazuar se në mënyrë të kundërligjshme ka bërë tjetërsimin e pronës.

Pasi që hetimet ndaj tij kishin filluar, siç thuhet në aktvendimin e kryetarit Muhaxheri, duke e pas parasysh pozitën e Selmanajt, është vlerësuar se prezenca e tij në zyrë, i pengon hetimet.